அணுப்புதல் / அனுப்புதல் என்பவற்றில் எச்சொல் சரியான தமிழ்ச்சொல் ?!

அணு (னு)  ‘னு’ என்னும் எழுத்தைப்பயன்படுத்தாமல் ‘ணு’ என்பதைப்பயன்படுத்துவதே சரியாகும். 

சற்று விளக்கமாகச்சொல்வதென்றால், 

“அ” எனும் எழுத்தைத்தொடர்ந்து ‘னு’ என்னும் எழுத்தைப் பயன்படுத்துவது பிழையாகும். ஆனாலும், பல்லாண்டுகளாகப் பயன்படுத்திவருகிறோம். அதேவேளையில், தமிழ்நாட்டில் தனித்தமிழ்ப்பற்றாளர்களாகிய சிலர்  ‘அனுப்புதல்’ என்பதைத்தவிர்த்து ‘விடுதல்/விடல்/விடுநர்’ எனும் செற்களைப்பயன்படுத்திவந்துளர். 

மொழிஞாயிறு தேவநேயப்பாவாணர் வழிவந்த வேர்ச்சொல்லாய்வாளரான சொல்லாய்வறிஞர் அருளியார் ஐயாவின் அண்மைய ஆய்வின்படி, அனுப்புதல் என்னும் அந்தச்சொல்லைத்தவிர்க்காதீர்; ‘னு’ என்னும் எழுத்தை நீக்கிவிட்டு ‘ணு’ எனும் எழுத்தை அவ்விடத்திலிட்டு “அணுப்புதல்/அணுப்புநர்” என எழுதவேண்டிவலியுறுத்தியுள்ளார்.

அணுகு/அணுகுதல் என்றால் ஒருவரிடம் சென்று அதாவது ஒருவரிடத்தில் நெருங்கி என்பது பொருளாகும். 

அணுகிப்பேசு > ஒருவரிடத்தில் சென்று பேசு; நெருங்கிச்சென்றுபேசு. 

அண்முதல் என்றால் அண்ணுதல் , கிட்டுதல்

அண்மு_தல் என்பதே இச்சொல் .

௧.

அண்மை :

அண் – என்ற அடிச்சொல் அடுத்திருத்தலைக் குறிக்கும்.

அண்+ அம் =   அணம்.

அண் > அண்முதல் /அண்மித்தல்.
அண் > அண்டை. ( அண்டை நாடு = அடுத்திருக்கும் நாடு)
அண்டு தல் > அணுகுதல் = கிட்டுதல் , நெருங்குதல்.
அண் > அண்மை.
அண்டை / அண்மை – என்றால் அருகில் இருப்பது.

அணுக்கன் – நெருங்கியவன் நெருங்கியவன்

அண்முதல் – சேர்தல்,அணுகல்.

அண்முவர் – சேர்ந்தின்புறுவர்

அண்மினார் -அணுகினார் .

அணம் என்ற  தொழிற்பெயர் விகுதியனது தமிழில் பலசொற்களில் வருகிறது. அவற்றுள் சிலவற்றைப்பார்ப்போம்.  வினை யல்லாதனவும் இவ்விகுதியைப்பெறுதலுண்டு. இவ்விகுதி பெற்ற சொற்கள்சில பிறமொழிகளிலும்  சென்று ஆட்சி பெற்றுள்ளன.

ப ட்டணம் , ஆரணம்,கட்டணம்,ஏரணம்,காரணம்

(சாரணம்)>   சாரணர்,தோரணம்,வாரணம்

என்று அவைபலவாம்.

இங்கு  ”அணம்” என்ற விகுதியைமட்டும் ஆய்வு செய்வோம்.

௨. அ என்பது சுட்டு. இச்சுட்டு அந்த, அது போன்ற தொடக்கத்துப்பலவற்றின் மூலமாகவுளது.

அ >  அண்.

அண் > அண்முதல்.  அண்மித்தல்.

அண் > அண்டை.

அண் > அண்மை.

அண்> அணிமை.

அண்> அணை.

அண் >  அணைத்தல்.

அண் >  அணை>    அணைக்கட்டு.

அண் > அணி >   அணிதல்.

உடலை அடுத்து நிற்பது ஒருவன் ஆடையும் அணிகலன்களுமே.

சேலை முதலியன உடலையணைத்துக்கொண்டு நிற்பன.  சேலையானது இடையையும் கால்களையும்  அணைத்துநிற்பது.

அனு பற்றிய செய்திகளையும் பார்க்கலாம் .

“அனு” என்பதற்கு தமிழில் எப்பொருளும் இல்லை .

“அந்”என்ற முன்னொட்டானது சங்கதத்தின் எதிர்மறைச்சொற்களுக்காக இடப்படும் ஒன்றாகவுள.

ஒருசில சங்கதச்சொற்களை இங்கே பார்க்கலாம் .

அந்நியர் ,அனுபவம்,அனுபூதி,அனுகூலம் ,அனுக்கிரஹம், அனுஷ்டானம் , அனுமதி , அநீதி , அந்தம் , அந்தாதி போன்ற மிகுதியான சொற்கள் வடமொழியெனும் சங்கதத்தில் உள்ளதைக்காணலாம் .

சில வேர்ச்சொல்லாய்வாளர்கள் அனுப்பு என்பது வினைச்சொல் சங்கத முன்னொட்டான “அனு”விற்கும் தமிழிலுள்ள வினைச்சொல்லான அனுப்பிற்கும் தொடர்புல்லை என்று கூறினாலும் அவர்களால் சரியான சான்று பகர முடியவில்லை .

ஒருவரைச் சென்றையடைய அல்லது ஒருவரிடத்தில் நெருங்கிப் போகச்செய்கிற வேர்ச்சொல்லாட்சிகளைக்கொண்ட அணுகு என்னும் சொல்லிலுள்ள (முச்சுழி ணகர உகரமே) ‘ணு’ என்னும் எழுத்தே அணுப்பு / அணுப்பியமை என்பதிலும் எழுதப்படவேண்டும் என்பதே சரி. 

தமிழில் உள்ள பிழைகளை சுட்டிக்காட்டிச்சான்று பகிரினும் யாரும் அவற்றை மாற்றியமைத்து மொழிக்கு உயிர்ப்பு கொடுக்க முயல்வதில்லை . மக்கள் மீது எவராலும் குற்றங்கூறமுடியாது . இது தமிழ்த்துறை ஆய்வாளர்களின் பணி . அவர்கள் சான்றொடு மக்களுக்குக்கொடுத்தாக வேண்டுமெனிலும் அவை சரியானமுறையில் செயற்படுத்தப்படாமல் உள்ளது .

தனிமாந்தச்செயற்பாட்டால் எந்தளவிற்கு இந்தப்பணியைச்செய்ய முடியுமோ அந்தளவிற்கு முயல்கிறோம் .

பிறமொழிச்சொற்களை வழியணுப்பிவைத்துவிட்டு தமிழ்ச்சொற்களை ஐயமுறப்பயன்படுத்தி எம்தமிழின் தொன்மையைக்காத்து நிற்போம்.

நன்றி ..

வாழ்கதமிழ் .

எழுத்து : துளிவானொலி